Versi scelti da “La peddi nova”

Ecco una scelta di versi da “La peddi nova” (Sellerio), Ignazio Buttitta

P. 25

Voggh’essiri un cocciu di rina

nni la rina di la praja;

un pisci nni la riti cu l’autri

mpignati a sfunnari

la gaggia chi li chiuj.

***

P. 57

Cu l’occhi

dintra a l’occhi d’iddi

mi lu vivu cu li lacrimi, l’amuri,

a stizzi,

comu sangu di nnuccenti.

***

P. 39

Vertuli di picciotti schetti

pènninu supra maiddi

di sucu russu di pumadamuri:

aranci all’arbulu ntra ddi pitturini,

disiu di divintari latru,

disiu di latti,

disiu ca s’arruspigghia

assicutatu di lapi.

***

P. 43

A parti, c’è di diri,

ca l’antipatia,

havi lu grittu e lu riversu,

comu lu buttuni, ed è ricipruca;

iddi parranu cu la nànfara,

iu cu la vucca,

e mi capiscinu

puru li babbaluci.

***

P. 45

Sunnu l’amici

chi spugghiaru li statui

di li robbi vecchi

e camuluti di lu tempu,

chi supra li testi ncurunati

nturciunianu trizzi d’agghia

e appizzanu rami d’alivi

a li spati puntati.

L’amici ca vidinu cu l’occhi

di l’omini c’hannu a vèniri

e fannu minuti li seculi.

Amici vasci,

ma tantu gàvuti a talialli

ca mi firrianu l’occhi.

***

P. 49

St’addevi cca sutta

Chi sunnu, na truppa?

«E tu, ed iu, è mia!»

Jocu e vucciria.

***

P. 59

Li morti quannu mòrinu

nun mòrinu allura,

comu li serpi pistati

ca mòvinu la cuda

doppu morti,

comu li pisci piscati

ca sàtanu

nni lu funnu di la varca

e ciatanu ancora.

***

P. 65

Pueta mpignatu

mi dicinu, p’offisa;

comu si nun avissi la cammisa

e li robbi di ncoddu

e li scarpi a li pedi.

 ***

P. 71

La storia zappa a cintimitru

e l’omini hannu li pedi di chiummu.

Nun parra l’amarizza

chi mi cummogghia lu cori stanotti,

né le scuru supra li muntagni,

ma lu silenziu

di seculi luntani.

***

p. 153

Parru cu tia,

to è la curpa

si porti lu sidduni

e un ti lamenti;

si lu patruni, strincennu li denti

cu lu marruggiu mmanu e la capizza

t’arrimoodda li corna e ti l’aggrizza,

ti smancia li garruna,

ti fudda ntra li cianchi purpittuna,

t’ammacca ossa e spaddi,

ti sfricunia li caddi,

ti scorcia li custani,

ti spurpa comu un cani,

e supra la to carogna

ci sputa e ti svirgogna.

***

P. 83

Chi lassi quannu mori?

Chi lassi, jurnateri?

Chi lassi quannu mori

ai figghi e a la muggheri?

Lassi un cantaranu di pezzi

‘na cascitta china ‘i munnizzi

la to facci di mpinnuliatu

ncurniciata dintra ‘nu quatru,

lassi tri furchetti di lanna

la buffetta di to nanna

chi si ndondola e si nnaca

comu ‘na strùmmula chi scaca.

***

P. 129

casa e famigghia scànzanu timpesta,

l’omu scumpari e la famigghia resta.

***

P. 130

Vaiu unn’è ca chiancinu

e mi nni tornu

cu li quartari chini;

nun m’affliggi lu pisu,

ma nun sapiri comu sdivacalli.